14 december:

Finale MLLF 2026!!

Jaja, veer moge d'r weer bie zeen. Op vriedaag 2 jannewarie zinge veer in de finale van 't Midde Limburgs Leedjes Festival (MLLF) 2026!

Veer kieke d'r ontzettend nao oet en gaon ós bés doon om Remunj op ein waerdige meneer te vertaegeweurige.

30 november:

Uulemuzejem!

Veer zeen noe ouch vertaegeweurdigd in de etalaasj van 't Uulemuzejem oppeHamsjtraot! Veer veule ós vereerd!

11e van de 11e:

WÁÁT EIN FEES!!!

Vandaag waas 't dan zo wied... Ózze druim waas: ooit (minimaal) eine keer op de 11e van de 11e op 't grote podium sjtaon...en vadaag kwaam dae druim oet! Vanaaf vanmorge waas 't fees, eers zellef de aaftrap kieke oppe tillevisie en daonao de auto in op waeg nao de, jaowaal, artiesteparkeerplaats. Van dao-oet mit ein artiesteböske nao 't sjtasieplein. Dao waerde veer opgevange door de Sjeng Kraft Kompenei. De verzorging achter de sjerme waas prima verzorg, en veer ware nog neet good en waal dao of veer tróffe Bart Storcken en Ingrid zien nich, Christel de Laat. Dao höbbe veer leuke dinger mit opgenómme, wo veer noe nog efkes nieks euver zegke, maar die begin volgend jaor op L1 en Omroep Brabant te bekieke zólle zeen. 

't is bizar om dit deze eerste keer mit te make: artieste diesse normaliter allein van de tillevisie kins of op 't podium zuus, dao sjteisse noe ein gezellig präötje mit te make. En dan is 't kwart veur twee, ofwaal nog 10 minute en geisse nao 't podium...En dan zuusse, nao aangekondig te zeen, innins 18.000 miense in de prachtigste kleure sjtaon. Sjtimmung ten top!! En dan zing-se dien leedje....en det geit vanzellef. Waat eine adrenalinekick en waat sjmaak dét nao méééér. Hiej-óner ein impressie:

10 november: 

Nog maar éin nach sjlaope en dan bárs 't weer los! En veer zeen d'r bie!

Eine druim kömp oet: morge moge veer veur doezjende en doezjende vastelaovesvierders optraeje. Giester zoge veer al wie 't podium waerde opgeboewd en kóste v'r ós al ein bietje probere veur te sjtelle wie det morge zal veule. En al is 't dan maar mit éin leedje: det wördt onvergaetelik! Volg ós op L11 Alaaf en L1 Tillevisie. 

(Letste foto rechtsónger: (c) 't Gebaortehoes)

4 november:

Tiedsjtip optraeje Geweun Ingrid & Edwin op de 11evande11e in Remunj bekind!

Jao, 't is éch waor!! Veer sjtaon op de 11evande11e in Remunj (https://sjengkraftkompenei.nl/de11devande11de/# )!! De Sjeng Kraft Kompenei haet ós laote weite wie laat ós optraeje gepland sjteit: om 13.54 oer moge veer 't podium op om 17.000 vastelaovesvierders toe te zinge. Waanzinnig veuroetzich! 

25 oktober:

Morge is 't zowied: KUUL 2025

Morge 26 oktober moge veel ós nuuje leedje dan éindelik laote heure aan 't grote pebliek. KUUL 2025 belaof ein sjpektakel te waere mit 11 prachtige leedjes. Veer haope det geer in grote getale kómp loestere. De zaal geit aop om 13.30 oer en vanaaf 14 oer geit 't grote fees beginne. Zeet geer d't bie?

Foto: Esmee Luijpers Photography

26 september:

'T nuuje leedje is klaor!

Hertkloppinge! Wie sjpannend veulde 't wie veer ein paar daag geleje ein appje krege van Cleo. In det appje zoot ós nuuje leedje, helemaol aaf. V'r ware ein waek eerder al bliej mit de versie waat veer höbbe ingezónge. Maar noe ware ouch de blaozers klaor mit häör partie. En dao pasde maar ein waord biej....WOW!

't nummer swingt de pan oet en knált oet dien boxe!! Benuujd? Kóm nao KUUL op 26 oktober om 14 oer in De Ster in Maasneel. Veer zouwe 't leuk vinje es geen massaal kómp loestere, neet allein nao ós, maar ouch nao al die angere fantastische artieste. Same make v'r d'r eine prachtige middaag van!

17 september:

'T nuuje leedje veur 't kómmende sezoen is ingezonge.

Aafgeloupe waek zeen veer bie Cleo Simons in de sjtudio gewaes en höbbe veer ós nuuje leedje ingezonge. Oet de foto's bliek waal wieväöl lol veer dao in höbbe gehad😄🎉🎊

KUUL 2025

Op 26 oktober a.s. vindj de derde edisie van KUUL (Katers Uule Leedjs sjpektakel) plaats in De Ster in Remunj.

Geweun Ingrid & Edwin zeen d'r netuurlik bie!